“Tarixi milli təşəbbüs” kimi təqdim olunan bu layihə, süni intellektlə gücləndirilmiş elmi araşdırmalara sərmayə yatıraraq elmin sürətlə inkişaf etdirilməsini hədəfləyir. Tramp bu təşəbbüsün Amerika enerji üstünlüyünü, innovasiyanı və milli təhlükəsizliyi təmin etmək üçün əsas problemləri həll edəcəyini iddia edib. Onun sözlərinə görə, bu missiya insanoğlunun Aya enməsi və ya ilk nüvə silahının istifadəsi qədər mühüm olacaq.
Tramp bildirib ki, “dünyanın ən böyük federal elmi məlumat bazaları” üzərində təlim keçmiş “birləşdirilmiş süni intellekt platforması” qurmaqla hökumət elmi kəşflərin ard-arda gəlməsinə şərait yaradacaq. Belə platformaya çıxış ABŞ-ın aparıcı elmi laboratoriyalarını gücləndirəcək və süni intellektin hipotezləri tez sınaqdan keçirməsi, tədqiqat işlərini avtomatlaşdırması elmi inkişafı sürətləndirəcək.
Lakin bu missiyanın uğuru ictimai, özəl və akademik sektorlar arasında əməkdaşlığın möhkəmləndirilməsinə bağlıdır. Trampın əmri isə bu əməkdaşlıqların necə qurulacağı və maliyyələşdiriləcəyi barədə aydın detallar təqdim etmir. Bu da narahatlıq yaradır, çünki bir sıra alimlər bu ilin əvvəlində verilən fərmanlarla maliyyədən məhrum edilib və laboratoriyalardan uzaqlaşdırılıb.
Tənqidçilər — o cümlədən alimlər, siyasətçilər və tarixçilər — hesab edirlər ki, bu təşəbbüs real vəziyyətdən uzaqdır. Onların fikrincə, Tramp elmi institutlara hücum etdiyi bir dönəmdə belə bir layihənin uğurlu olacağına inanmaq çətindir. Həmçinin, bəzi tənqidçilər Trampın AI-nin imkanları və elmi inkişafın necə baş verdiyi barədə də yanlış təsəvvürlərə sahib olduğunu qeyd edirlər.
Dərc edildi:
19.12.2025
_1782639703.webp)
